اسلام آباد: وزیر اعظم عمران خان نے اقوام متحدہ کی سلامتی کونسل کے اجلاس کو خوش آیند قرار دے دیا۔ تفصیلات کے مطابق وزیر اعظم عمران خان نے آج ایک ٹویٹ میں کہا کہ پاکستان اقوام متحدہ کی سلامتی کونسل کے اجلاس کو خوش آیند قرار دیتا ہے۔وزیر اعظم نے لکھا کہ ہم سیکورٹی کونسل کی جانب سے ایک بار پھر مقبوضہ کشمیر کی صورت حال پر غور کا خیر مقدم کرتے ہیں، مقبوضہ جموں و کشمیر عالمی طور پر تسلیم شدہ متنازع معاملہ ہے، اور یہ سلامتی کونسل کے ایجنڈے پر موجود ہے۔ انھوں نے لکھا ’اقوام متحدہ کی سلامتی کونسل کی متعلقہ قراردادوں اور کشمیری عوام کی امنگوں کی روشنی میں مسئلہ کشمیر کے حل کی تدبیر وقت کا اہم تقاضا ہے۔‘ان کا کہنا تھا کہ سیکورٹی کونسل کا مقبوضہ کشمیر پر غور وادی میں درپیش سنگین صورت حال کا اعتراف ہے، انھوں نے مطالبہ کیا کہ کشمیر کا مسئلہ کشمیری عوام کی خواہشات کے مطابق حل ہونا چاہیے۔ https://twitter.com/ImranKhanPTI/status/1217718387666714625 وزیر اعظم عمران خان نے ایک بار پھر واضح کیا کہ پاکستان حق خود ارادیت ملنے تک کشمیریوں کی اخلاقی، سیاسی اور سفارتی حمایت جاری رکھے گا، اس سلسلے میں پاکستان اقوام متحدہ کی سلامتی کونسل کے اجلاس کو خوش آیند قرار دیتا ہے۔ خیال رہے کہ وزیر خارجہ شاہ محمود قریشی نے آج نیویارک میں یو این سیکریٹری جنرل انتونیو گوتریس اور یو این صدر سے ملاقاتیں کیں، جن میں مشرق وسطیٰ اور مقبوضہ کشمیر میں انسانی حقوق کی پامالیوں پر تبادلہ خیال کیا گیا۔ ان کا کہنا تھا سلامتی کونسل میں پانچ ماہ کے دوران دوسری بار مسئلہ کشمیر پر بات ہوئی ہے، مقبوضہ کشمیر کے حالات پر تین اجلاس منعقد کرنے پر ہم شکریہ ادا کرتے ہیں۔