پی ایس ایل 11: کراچی میں ٹیموں کا پرتپاک استقبال

پاکستان سپر لیگ (پی ایس ایل) 11 کے سلسلے میں حیدرآباد کنگز مین اور پشاور زلمی کی ٹیمیں کراچی پہنچ گئیں، جہاں ہوٹل آمد پر ان کا شاندار استقبال کیا گیا۔

تفصیلات کے مطابق دونوں ٹیموں کے کھلاڑیوں کا بینڈ باجے کے ساتھ استقبال کیا گیا جبکہ ان پر پھولوں کی پتیاں بھی نچھاور کی گئیں۔ اس موقع پر کھلاڑی خوشگوار موڈ میں دکھائی دیے۔

حیدرآباد کنگز مین کی ٹیم آج نیشنل اسٹیڈیم کراچی میں پریکٹس سیشن میں حصہ لے گی تاکہ لیگ کے آئندہ مرحلے کے لیے اپنی تیاریوں کو حتمی شکل دے سکے۔

واضح رہے کہ کراچی میں ایچ بی ایل پی ایس ایل 11 کا دوسرا مرحلہ 8 اپریل سے شروع ہوگا۔