کراچی: شہر قائد کے تجارتی مرکز صدر میں واقع زینب انٹرنیشنل مارکیٹ کی دکانوں میں آگ لگ گئی، فائر فائٹرز آگ بجھانے میں مصروف ہیں، تاہم آگ مزید شدت اختیار کرتی جا رہی ہے۔ کراچی کے علاقے صدر میں مشہور زینب انٹرنیشنل مارکیٹ کی دکانوں میں لگنے والی آگ شدت اختیار کر گئی ہے، فائر بریگیڈ کی 4 گاڑیاں آگ پر قابو پانے میں مصروف ہیں، حکام کا کہنا ہے کہ مزید گاڑیاں موقع پر روانہ کی جا رہی ہیں۔ https://twitter.com/KtrafficpoliceE/status/1225308932970831872 آگ انٹرنیشنل مارکیٹ کی چوتھی منزل پر واقع دکانوں میں لگی ہے، فائر بریگیڈ حکام کے مطابق اس مارکیٹ میں گارمنٹس کی دکانیں اور گودام ہیں، پولیس کا کہنا ہے کہ واقعے میں کسی قسم کے جانی نقصان کی اطلاع نہیں ملی۔کراچی ٹریفک پولیس کا کہنا ہے کہ زینب مارکیٹ کے سامنے انٹرنیشنل مارکیٹ میں آتش زدگی کے باعث فوارہ چوک سے اس طرف آنے والے ٹریفک کو ایوان صدر روڈ کی جانب منتقل کر دیا گیا ہے۔