کراچی کے علاقے کورنگی میں گتا فیکٹری میں آگ لگنے سے بھاری مالیت کا گتا جل گیا جبکہ جمشید روڈ پر ریسٹورنٹ میں آگ لگ گئی، دونوں واقعات میں خوش قسمتی سے کوئی جانی نقصان نہیں ہوا۔ فائر بریگیڈ حکام کے مطابق ویٹا چورنگی پر لگی آگ بجھانے کے لئے فائر بریگیڈ کی 3 گاڑیاں بروقت پہنچ گئیں، 3 گھنٹے کے اندر آگ پر قابو پالیا گیا تاہم آگ لگنے کی وجہ معلوم نہیں ہوسکی، آگ لگنے سے بھاری مالیت کا گتا جل گیا۔ ادھر جمشید روڈ پر قائم ریسٹورنٹ میں بھی اچانک آگ بھڑک اٹھی، آگ کی شدت زیادہ ہونے کے باعث ریسٹورنٹ میں رکھا گیا سامان جل گیا تاہم اس واقعہ میں بھی کوئی جانی نقصان نہیں ہوا۔فائر بریگیڈ نے کچھ دیر بعد آگ پر قابو پالیا۔